ធ្វើម៉េចទើបដឹងថាលោកអ្នកមានបញ្ញាផ្នែកខាងអ្វី? ហើយគួរចាប់អាជីពអ្វីឲ្យត្រូវនឹងដុងពីកំណើត?
ទោះជាបែបនេះក្ដី មានទ្រឹស្ដីជាច្រើនដែលយល់ថា មនុស្សយើងមានបញ្ញាផ្សេងៗគ្នា ដែលមិនអាចនិយាយថា មនុស្សម្នាក់ចេះគ្រប់សព្វបាននោះទេ ឬក៏ថាមនុស្សម្នាក់គ្មានបញ្ញានោះទេ គ្រាន់តែថាពេលខ្លះ មនុស្សម្នាក់ចាប់អាជីពខុសនឹងសមត្ថភាពពិតប្រាកដដែលខ្លួនមាន និងខុសពីចំណង់ចំណូលចិត្ត (ដុង - vacation)ម៉្លោះហើយ គេមិនអាចបំពេញកិច្ចការនោះប្រកបដោយសក្ដានុពលខ្លាំង។ អ្នកខ្លះមិនពូកែផ្នែកនេះ ប៉ុន្តែពូកែផ្នែកនោះ ហ្នឹងហើយគេហៅថាបញ្ញា ដែលមនុស្សយើងមានផ្សេងៗគ្នា។
អ្នកចិត្តវិទ្យាដ៏ល្បីល្បាញសញ្ជាតិអាមេរិកលោកហូវើតហ្កាតណឺ (Howard Gardner) ប្រចាំសាកលវិទ្យាល័យហាវើត (Harvard University) បានបង្កើតទ្រឹស្ដីដែលថាមនុស្សយើងនៅក្នុងពិភពលោកនេះ មានបញ្ញាផ្សេងៗគ្នារហូតដល់ទៅប្រាំបីបែប។ លោកហ្កាតណឺជឿថាក្រៅពីជំនាញ - សមត្ថភាព និងភាពប៉ិនប្រសប់ មនុស្សនៅមានបញ្ញាខាងវិស័យជាច្រើនដូចជាក្នុងវិស័យតូរ្យតន្ត្រី - ទំនាក់ទំនងអន្តរបុគ្គល – គំហើញ និងភាសាជាដើម។ ខាងក្រោមនេះ ជាបញ្ញា ៨ យ៉ាងនិងអាជីពដែលសក្ដិសមសម្រាប់លោកអ្នកចាប់យក។
...បុគ្គល៥រូបដែលរៀនមិនចប់ថ្នាក់បរិញ្ញាបត្រ តែអភិវឌ្ឍខ្លួនក្លាយជាមហាសេដ្ឋីមានប្រាក់រាប់ពាន់លានដុល្លារ...
១- បញ្ញាខាងគំហើញ និងប្លង់ (Visual – Spacial Intelligence)
បុគ្គលដែលមានបញ្ញាខាង «គំហើញ និងប្លង់» ពូកែខាងគន់គូរ។ បុគ្គលចំពូកនេះពូកែខាងកំណត់ទិសតំបន់ និងផែនទី - តារាង – រូបភាពវីឌីអូ និងរូបថត។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ចូលចិត្តអាននិងសរសេរ
- ចូលចិត្តមើលនិងវិភាគរូបភាព – ក្រាហ្វិក និងតារាង
- ចូលចិត្តគូសវាសប្លង់ គូរគំនូរ និងសិល្បៈនេត្រាទស្សន៍ (Visual Arts)
- ពូកែកាត់យល់ និងវិនិច្ឆ័យទម្រង់បែបផែនដែលមានលក្ខណៈស្មុគស្មាញ ដែលមនុស្សទូទៅមើលមិនឃើញ គិតមិនចេញ ក៏គេឆាប់កាត់យល់
មុខអាជីពដែលបុគ្គលមានបញ្ញាប្រភេទនេះគួរចាប់យក
- គួរចាប់អាជីពជាអ្នកគូរប្លង់ ឬស្ថាបត្យករ (architect)
- វិចិត្រករ (អ្នកគូរគំនូរ)
- វិស្វករសំណង់
...បុគ្គល ៧ រូបរៀនចប់ថ្នាក់បណ្ឌិតនៅអាយុក្រោម ២០ ឆ្នាំ ពីសាកលវិទ្យាល័យល្បីៗក្នុងលោក...
២- បញ្ញាខាងភាសា និងការនិយាយ
អ្នកដែលមានបញ្ញាខាងភាសាវិទ្យា គឺជាអ្នកដែលប្រសប់ខាងប្រើពាក្យពេចន៍ លើកដាក់ ថែមថយ តាមកាលៈទេសៈ ទាំងក្នុងផ្នែកនិយាយផ្ទាល់មាត់ និងទាំងផ្នែកសរសេរ ដោយរៀបពាក្យពេចន៍ឃ្លោងឃ្លាឲ្យពិរោះពិសា។ បុគ្គលក្នុងចំពូកនេះពូកែសរសេររឿង – ពូកែចាំប្រវត្តិ និងរឿងរ៉ាវផ្សេងៗ និងពូកែអានសៀវភៅ។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ពូកែចាំពាក្យសំដីដែលគេនិយាយ ឬពូកែចាំប្រវត្តិរឿងរ៉ាវផ្សេងៗ ទោះបីកន្លងទៅតាំងពីកាលណាកាលណីក៏ដោយ
- ចូលចិត្តអំណាន និងសំណេរ (អានសៀវភៅ និងសរសេរ)
- ពូកែនិយាយរកហេតុផល ពិភាក្សាវែកញែក
- ពូកែពន្យល់ ឲ្យគេឆាប់យល់ គេងាយយល់
- ប្រសប់និយាយស្ដី មិនឲ្យគេធុញ និងប្រសប់បញ្ចូលភាពកំប្លុកកំប្លែងនៅក្នុងនោះ
មុខអាជីពដែលបុគ្គលមានបញ្ញាប្រភេទនេះគួរចាប់យក
- អ្នកនិពន្ធសៀវភៅ និពន្ធអត្ថបទ និងអ្នកសារព័ត៌មាន
- មេធាវី (ពេលឡើងការពារក្ដី លុះត្រាតែពូកែនិយាយ ពូកែចាំច្បាប់ ពូកែលើកទឡ្ហីករណ៍)
- គ្រូបង្រៀន (ពូកែពន្យល់ និងពូកែផ្លាស់ប្ដូរបរិយាកាសឲ្យសិស្សសប្បាយ កុំឲ្យសិស្សធុញទ្រាន់)
...ចង់រៀននៅក្រៅប្រទេសមែនទេ? ទីក្រុងទាំងប្រាំនេះ ជាកន្លែងសក្ដិសមបំផុត...
៣- បញ្ញាខាងគណិតវិទ្យា និងតក្កវិជ្ជា
អ្នកដែលមានបញ្ញាខាងគណិតវិទ្យា និងតក្កវិជ្ជា ពូកែវិភាគថ្លឹងថ្លែងរកហេតុផល ឆាប់យល់នូវសណ្ឋានឬទម្រង់អ្វីមួយ និងវិភាគនិងសន្និដ្ឋានតាមតក្កវិធី (សមហេតុសមផល មានទឡ្ហីករណ៍គ្រប់គ្រាន់ ដោយមិនចេះតែសន្និដ្ឋានតាមនឹកឃើញ)។ អ្នកមានបញ្ញាខាងផ្នែកនេះពូកែខាងគិតលេខនព្វន្ត – អនុគមន៍ និងសំណុំ។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ជំនាញខាងដោះស្រាយបញ្ញា
- មានចំណូលចិត្តខាងគិតអំពីបញ្ញត្តិអរូបី (តាង សំណុំ អនុគមន៍)
- ចូលចិត្តពិសោធអ្វីមួយដើម្បីផ្ទៀងផ្ទាត់ចង់ដឹងការពិត ដោយមិនចេះតែជឿអ្វីផ្ដេសផ្ដាស
- ពូកែដោះស្រាយលំហាត់គណិតវិទ្យាពិបាកៗ និងស៊ីជម្រៅ
មុខអាជីពដែលបុគ្គលមានបញ្ញាប្រភេទនេះគួរចាប់យក
- អ្នកវិទ្យាសាស្ត្រ
- អ្នកគណិតវិទ្យា
- អ្នកសរសេរសូហ្វវែកុំព្យូទ័រ (computer programmer)
- វិស្វករ
- គណនេយ្យករ
...តើធ្វើដូចម្ដេចទើបខួរក្បាលមានបញ្ញា និងមិនងាយភ្លេចភ្លាំង?...
៤- បញ្ញាខាងកាយសម្បទា
បុគ្គលដែលមានបញ្ញាខាងប្រើកាយសម្បទា ប្រសប់ប្រើចលនារាងកាយ – ពូកែសំដែងពត់ពេនខ្លួន និងគ្រប់គ្រងចលនារាងកាយយ៉ាងប៉ិនប្រសប់។ អ្នកដែលមានបញ្ញាផ្នែកនេះ ច្រើនមានអំណោយផលពីធម្មជាតិខាងសរីរាង្គកាយ។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ពូកែរាំពត់ពេនខ្លួន គ្រប់ចង្វាក់ គ្រប់ក្បាច់ និងពូកែលេងកីឡា
- ចូលចិត្តកែច្នៃវត្ថុផ្សេងៗ ដោយប្រើដៃ
- មានកាយសម្បទាអំណោយផលពីធម្មជាតិ និងស៊ីសង្វាក់គ្នាទាំងព្រម ទាំងដៃជើង និងដងខ្លួន
- ពេលស្ដាប់គេនិយាយ ឬឃើញគេធ្វើអ្វីមួយហើយ យកមកអនុវត្តខ្លួនឯង
មុខអាជីពដែលបុគ្គលមានបញ្ញាប្រភេទនេះគួរចាប់យក
- អ្នករាំ ឬ អ្នករបាំ
- អ្នកសាងសង់
- ជាងចម្លាក់
- តារាសម្ដែង ឬតារាភាពយន្ត
- តារាបង្ហាញម៉ូត
...អាហារ១០ មុខជួយបង្កើនថាមពល និង សមត្ថភាពខួរក្បាលកាន់តែប្រសើរ...
៥- បញ្ញាខាងតូរ្យតន្ត្រី និងបទភ្លេង
បុគ្គលដែលមានបញ្ញាខាងតូរ្យតន្ត្រីពូកែខាងការគិតអំពីទម្រង់បែប បទ និងចំណាប់ចុងចួន និងសំឡេង។ គេចូលចិត្តតន្ត្រី និងបទភ្លេងតាំងពីក្មេង និងពូកែនិពន្ធបទភ្លេង និងពូកែសម្ដែង និងរាំតាមចង្វាក់ភ្លេង។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ចូលចិត្តច្រៀង និងប្រគំបទភ្លេង
- ឆាប់យល់អំពីរបៀបតែងបទភ្លេង និងតុងភ្លេង
- ចងចាំទំនុកច្រៀង និងសាច់ភ្លេងបានល្អ
- យល់ស៊ីជម្រៅអំពីរបៀបប្រគំតន្ត្រី អំពីណោតភ្លេង និងចំណាប់ចុងចួន
មុខអាជីពដែលបុគ្គលមានបញ្ញាប្រភេទនេះគួរចាប់យក
- តន្ត្រីករ
- អ្នកនិពន្ធបទភ្លេង
- អ្នកចម្រៀង ឬតារាចម្រៀង
- គ្រូបង្រៀនរបៀបនិពន្ធបទភ្លេង
- អ្នកដឹកនាំវង់ភ្លេង ឬក្រុមភ្លេង (conductor)
...បុគ្គល ៨រូបដែលមានបញ្ញា (IQ) ខ្ពស់ជាងគេបំផុតក្នុងពិភពលោកបុគ្គល៨រូបដែលមានបញ្ញា (IQ) ខ្ពស់ជាងគេបំផុតក្នុងពិភពលោក...
៦- បញ្ញាខាងទំនាក់ទំនងអន្តរបុគ្គល (interpersonal intelligence)
បុគ្គលដែលមានបញ្ញាខាងទំនាក់ទំនងអន្តរបុគ្គល ជាអ្នកដែលពូកែខាងស្វែងយល់ និងស្មានត្រូវអំពីអ្នកដទៃ ដូចជាចំណង់ចំណូលចិត្តរបស់គេ - ផ្លូវចិត្តរបស់គេ និងពូកែខាងខិតទៅជិតអ្នកដទៃ ដើម្បីបង្កើតភាពជិតស្និទ្ធជាមួយអ្នកដទៃ។ ភាសាសាមញ្ញថា «មនុស្សឆាប់ចូលគេចុះ» ឬ «ឆាប់ចូលក្នុងជំនុំចំណោមគេចុះ»។ អ្នកដែលមានបញ្ញាផ្នែកនេះប៉ិនប្រសប់ខាងស្ទាបស្ទង់ដឹងអំពីផ្លូវ ចិត្តអ្នកដទៃ - ពូកែលួងលោម លើកទឹកចិត្ត - ពូកែផ្គាប់ចិត្តគេដើម្បីឲ្យត្រូវនឹងចំណង់ចំណូលចិត្តរបស់គេ និងអ្វីដែលមានក្នុងចិត្តរបស់អ្នកដទៃ ក៏បុគ្គលប្រភេទនេះឆាប់ស្វែងយល់ផងដែរ។ មួយវិញទៀត បុគ្គលប្រភេទនេះសម្បូរពាក្យពេចន៍និយាយ គឺនិយាយមិនចេះអស់ពាក្យនិយាយ ហើយនិយាយចេញទៅ មានអំណាចទាក់ទាញ ធ្វើឲ្យគេចូលចិត្តស្ដាប់។ និយាយមួយម៉ាត់ឲ្យស្រួលស្ដាប់ គឺអ្នកមានបញ្ញានេះ គឺអ្នកដែលពូកែវោហារ ឬអ្នកបានវោហារ។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ពូកែខាងទាក់ទងផ្ទាល់មាត់ (ថ្លែងទៅកាន់ទស្សនិកជន។ល។)
- ពូកែខាងទាក់ទងមិនផ្ទាល់ (non-verbal communication)
- ពូកែខាងវិភាគថ្លឹងថ្លែង និងមើលឃើញបញ្ហាពីច្រើនជ្រុង និងគ្រប់ជ្រុងជ្រោយ
- ពូកែបង្កើតទំនាក់ទំនងល្អ ជាមួយអ្នកដទៃ
- ពូកែរិះរកវិធីដោះស្រាយបញ្ហារកាំរកូសដែលកើតឡើងនៅក្នុងអង្គភាព
មុខអាជីពដែលបុគ្គលមានបញ្ញាប្រភេទនេះគួរចាប់យក
- អ្នកចិត្តវិទ្យា
- អ្នកទស្សនវិជ្ជា
- អ្នកផ្ដល់ប្រឹក្សាផ្លូវចិត្ត ឬអ្នកផ្ដល់ប្រឹក្សាអំពីបញ្ហាប្រឈមអ្វីមួយ ដើម្បីរកដំណោះស្រាយ
- អ្នកជំនាញខាងលក់ទំនិញ ទាំងប្រភេទសេវាកម្ម និងផលិតផល
- អ្នកនយោបាយ (លក្ខណៈសម្បត្តិបឋមសម្រាប់អ្នកនយោបាយគឺពូកែវោហារ ពូកែឡើងថ្លែងពាក្យពេចន៍ផ្សេងៗនៅលើវេទិកាសាធារណៈ)
...បើចង់ឲ្យកូនៗក្លាយជាបុគ្គលអស្ចារ្យ ឪពុកម្តាយត្រូវអនុវត្តមូលដ្ឋានគ្រឹះទាំង ៤នេះ!...
៧- បញ្ញាខាងទំនាក់ទំនងឯកបុគ្គល (intra-personal intelligence)
បុគ្គលដែលមានបញ្ញាផ្នែកនេះ ពូកែខាងសិក្សាស្វែងយល់ស៊ីជម្រៅអំពីផ្លូវចិត្ត និងស្ថានភាពរបស់ខ្លួនឯង – អំពីអារម្មណ៍ និងទឹកចិត្តរបស់ខ្លួនឯង។ មនុស្សប្រភេទនេះ ចូលចិត្តវិភាគថ្លឹងថ្លែង និងវាយតម្លៃអំពីខ្លួនឯង ធៀបនឹងមជ្ឈដ្ឋានខាងក្រៅ (self-reflection) និងពេលខ្លះប្រើអារម្មណ៍អណ្ដែតអណ្ដូង – លើកឧទាហរណ៍សម្រាប់ព្រឹត្តិការណ៍ដែលអាចកើតមាននាពេលអនាគត ហើយត្រៀមដោះស្រាយបញ្ហានោះទុកឲ្យហើយ។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ពូកែវិភាគផ្គូផ្គងរកចំណុចខ្លាំង និងចំណុចខ្សោយរបស់អ្នកដទៃ
- ចូលចិត្តយកទ្រឹស្ដី និងទស្សនៈអ្នកដទៃមកវិភាគថ្លឹងថ្លែងរកហេតុផល ដើម្បីគាំទ្រ ឬជំទាស់
- ស្គាល់ខ្លួនឯងបានច្បាស់
- យល់ស៊ីជម្រៅអំពីអារម្មណ៍ និងទឹកចិត្តរបស់ខ្លួនឯង
- មុខអាជីពដែលបុគ្គលមានបញ្ញាប្រភេទនេះគួរចាប់យក
- អ្នកទស្សនវិជ្ជា
- អ្នកនិពន្ធសៀវភៅ
- អ្នកទ្រឹស្ដី
- អ្នកវិទ្យាសាស្ត្រ
...បុគ្គលល្បីៗលើលោកទាំង ២៥រូបនេះ សុទ្ធតែជាអតីតនិស្សិត Harvard!...
៨- បញ្ញាដែលទាក់ទងនឹងពិភពធម្មជាតិ
បុគ្គលដែលមានបញ្ញាប្រភេទនេះមានចំណូលចិត្តខាងពិភពធម្មជាតិ និងចូលចិត្តផ្សារភ្ជាប់ខ្លួននឹងធម្មជាតិ។ គេចូលចិត្តស្វែងយល់អំពីប្រភេទសត្វ និងរុក្ខជាតិ និងហាក់ដូចជាមានវិញ្ញាណពិសេសឆាប់ទទួលអារម្មណ៍ដឹងអំពីធម្មជាតិ ជាងមនុស្សទូទៅ។
ភិនភាគលក្ខណៈដែលបង្ហាញថាលោកអ្នកមានបញ្ញាខាងផ្នែកនេះ
- ចូលចិត្តមុខវិជ្ជារុក្ខវិទ្យា - ជីវវិទ្យា និងសត្តវិទ្យា
- ពូកែចាត់ថ្នាក់ប្រភេទអ្វីមួយ
- ចូលចិត្តដំណើរកម្សាន្ត បោះជំរុំ រៀបចំសួនច្បារ និងរុក្ខជាតិ ឡើងភ្នំ និងចូលចិត្តធម្មជាតិ
- មិនចូលចិត្តរៀនមុខវិជ្ជាណាដែលមិនទាក់ទងនឹងធម្មជាតិ
មុខអាជីពដែលបុគ្គលមានបញ្ញាប្រភេទនេះគួរចាប់យក
- អ្នកជីវវិទ្យា
- អ្នកអភិរក្សធនធានធម្មជាតិ (អភិរក្សសត្វព្រៃ ឬអ្នកគ្រប់គ្រងតំបន់ទេសចរណ៍ធម្មជាតិ។ល។)
- អ្នករៀបចំប្លង់សួនច្បារ ឬនគរូបនីយកម្ម
- កសិករ
http://www.thebnews.com/news/6914/
Post a Comment