ច្បាប់​ធ្វើ​​អាជីវកម្ម​ទាំង ៩ ​របស់​មហាសេដ្ឋី Mark Cuban

ច្បាប់​ធ្វើ​​អាជីវកម្ម​ទាំង ៩ ​របស់​មហាសេដ្ឋី Mark Cuban     cnbc.com 

នៅ​ពេល​ដែល​និយាយ​​ពី​ឈ្មោះ​លោក ​ Mark Cuban ប្រិយមិត្ត​ទំនង​ជា​មិន​សូវ​ស្គាល់​ច្បាស់​ប៉ុន្មាន​នោះ​ឡើយ ហើយ​លោក​ហាក់​មិន​សូវ​ជា​លេចធ្លោ​នៅ​លើ​ឆាក​អន្តរជាតិ​ខ្លាំង​ដូច​​មហាសេដ្ឋី Bill Gates ​មហាសេដ្ឋី Mark Zuckerberg ឬ មហាសេដ្ឋី Warren Buffett ​នោះទេ។ យ៉ាងណាមិញ បើ​និយាយ​នៅ​បរិបទ​​លើ​ទឹកដី​អាមេរិក​វិញ​ ​មហាសេដ្ឋី​វ័យ ៥៦ ឆ្នាំ​រូប​នេះ គឺ​ជា​អ្នក​ជំនួញ​ដ៏​​មាន​ប្រជាប្រិយភាព​​មួយ​រូប​សំបូរ​ទៅ​ដោយ​យុទ្ធសាស្ត្រ​មិន​​ធម្មតា​ដែរ។

សម្រាប់​ដំបូន្មាន​អាជីវកម្ម ​មហាសេដ្ឋី​ជំនួញ​ខាងលើ​បាន​​បង្ហាញ​ផ្លូវ​ពី​គន្លឹះ​ធ្វើ​អាជីវកម្ម​មួយ​ចំនួន​ដែល​ជា​ច្បាប់​របស់​លោក​​​ក្នុង​ការ​បង្កើត ដឹកនាំ និង គ្រប់គ្រង​អាជីវកម្ម​ចំនួន ៩ ​ដូច​ខាងក្រោមនេះ៖ ​​​​

១) ចង់​បង្កើត​ក្រុមហ៊ុន​មួយ​លុះត្រា​តែ​អ្នក​មាន​​ក្តី​ស្រមៃ​ និង ​ស្រលាញ់​លើ​​​មុខរបរ​អាជីវកម្ម​របស់​អ្នក។ បើ​គ្មាន​ក្តី​ស្រមៃ​ និង ក្តី​ស្រលាញ់​ដាក់ចិត្ត​ទៅ​លើ​មុខរបរ​អាជីវកម្ម​របស់​អ្នក​ទេ​នោះ​ ​សូម​កុំ​បង្កើត​​​​វា​ឡើង​។ ​

២​) បើ​អ្នក​មាន​យុទ្ធសាស្ត្រ​ធ្វើ​អាជីវកម្ម នោះ​មិនមែន​ជា​ក្តី​ស្រមៃ​​របស់​អ្នក​នោះ​​ទេ។ ​​​

៣) ជួល​បុគ្គលិក​ដែល​អ្នក​គិត​ថា​ ស្រលាញ់​ និង ពេញចិត្ត​ការងារ​របស់​អ្នក​ដូច​អ្នក​ដែរ។ ​

៤) ការ​លក់​ អាច​ធានា​បាន​អ្វីៗ​ទាំងអស់​នៅ​ក្នុង​​ក្រុមហ៊ុន​របស់​អ្នក។ អ្នក​ត្រូវ​ដឹង​ពី​របៀប​រក​លុយ​ឲ្យ​ក្រុមហ៊ុន​របស់​អ្នក​ ហើយ​នោះ​គឺ​ការ​ធ្វើ​ឲ្យ​ការ​លក់​របស់​អ្នក​មាន​ប្រសិទ្ធភាព និង កើន​ឡើង​ជា​បន្តបន្ទាប់​។

៥) អ្នក​ត្រូវ​ដឹង​ពី​​សមត្ថភាព​​ស្នូល​ ឬ លក្ខណៈ​ពិសេស​​​​នៅ​ក្នុង​ក្រុមហ៊ុន​របស់​​អ្នក និង ត្រូវ​ផ្ដោត​ទៅ​លើ​វា​​​ជា​អាទិភាព​ជានិច្ច។ ​បន្ទាប់​មក​ជួល​​មនុស្ស​ឲ្យ​ធ្វើ​ការ​​សម្រួច​សមត្ថភាព​ស្នូល​​នោះ​ឲ្យ​កាន់តែ​មុត​ស្រួច​ឡើង​។

៦) ជួល​បុគ្គលិក​ដែល​ធ្វើឲ្យ​​ក្រុមហ៊ុន​របស់​អ្នក​មាន​ថាមពល​ជានិច្ច។ កុំ​ជួល​បុគ្គលិក​ដែល​ចង់​តែ​ត្រួតត្រា​គេ កុំ​ជួល​បុគ្គលិក​ដែល​​​ចង់​តែ​បាន​តំណែង​ខ្ពស់ កុំ​ជួល​បុគ្គលិក​ដែល​ចង់​តែ​កសាង​អាណាចក្រ​​តែ​ម្នាក់​ឯង​នៅ​ក្នុង​ក្រុមហ៊ុន​របស់​អ្នក។ មនុស្ស​ប្រភេទ​នេះ​ អ្នក​មិន​គូរ​អនុញ្ញាត​ឲ្យ​មក​ធ្វើ​ការ​នៅ​ក្នុង​ក្រុមហ៊ុន​របស់​អ្នក​នោះ​​​ឡើយ។ ​

​៧) ផ្តល់​លទ្ធភាព​ឲ្យ​បុគ្គលិក​គ្រប់រូប​នៅ​ក្នុង​ក្រុមហ៊ុន​របស់​អ្នក​​ចេះ​ប្រើប្រាស់​ឧបករណ៍​បច្ចេកវិទ្យា​ថ្មីៗ​​ដោយ​ចំហ​។ កុំ​បិទ​សិទ្ធិ​ពួកគេ​ឲ្យ​សោះ ​បច្ចេកវិទ្យា​​គឺ​ជា​អ្វី​ដែល​ធ្វើ​ឲ្យ​បុគ្គលិក​ក្រុមហ៊ុន​របស់​អ្នក​កាន់តែ​ទាន់សម័យ ហើយ​ពួកគេ​អាច​ជួយ​​ស្វែង​រក​គន្លឹះ​ពង្រីក​អាជីវកម្ម​របស់​អ្នក​ដើរ​ទន្ទឹម​នឹង​ជា​មួយ​ប្រព័ន្ធ​បច្ចេកវិទ្យា​ទៀត​ផង។​​

៨) កុំ​ជួល​សេវាកម្ម​ទំនាក់ទំនង​សាធារណៈ (PR)​ ពី​ក្រុមហ៊ុន​ផ្សេង​មក​ធ្វើ​ការ​ឲ្យ​អ្នក។ អ្នក​ត្រូវ​ជួល​មនុស្ស​ដែល​មាន​សមត្ថភាព​ខាង​ទំនាក់ទំនង​សាធារណៈ​ឲ្យ​អ្នក​វិញ​ ដើម្បី​ធ្វើ​ការ​ប្រចាំការ​ឲ្យ​អ្នក ព្រោះ​ថា​ពួកគេ​នឹង​អាច​​សហការ​ជា​មួយ​អ្នក​គ្រប់ពេល។

៩) អ្នក​ត្រូវ​ធ្វើ​ឲ្យ​បរិស្ថាន​​នៅ​កន្លែង​ការងារ​របស់​អ្នក​ផ្តល់​ភាព​រីករាយ​ដល់​បុគ្គលិក​គ្រប់រូប​ជានិច្ច។ នៅ​ពេល​​ដែល​បុគ្គលិក​មាន​ភាព​រីករាយ ពួកគេ​​ធ្វើ​ការ​ដោយ​មាន​កម្លាំង​ចិត្ត មាន​ថាមពល ​និង អាច​ជួយ​ឲ្យ​សមិទ្ធផល​ការងារ​របស់​អ្នក​ដើរ​រលូន​ទៅ​មុខ​ទៀត​ផង៕

http://www.thebnews.com/news/855.html