តើ​ខ្សែជីវិត​មហាសេដ្ឋី​វ័យ​ចំណាស់​ប្រាក់​ចាយ​មិន​អស់ Amancio Ortega Gaona មាន​ប្រវត្តិ​ដូចម្តេចខ្លះ​?

លោក Amancio Ortega Gaona សញ្ជាតិ​អេ​ស្ប៉ា​ញ​មាន​វ័យ ៧៩ ជា​អ្នក​រចនា​ម៉ូដ​សំលៀកបំពាក់​ដ៏​ល្បី​មួយរូប​នៅលើ​ពិភពលោក ដោយ​បច្ចុប្បន្ន​លោក​បាន​ក្លាយជា​មហាសេដ្ឋី​លំដាប់​លេខ ៤ របស់​ពិភពលោក​ជាមួយនឹង​ទំហំ​ទឹកប្រាក់ ៧៧,២ ពាន់​លាន​ដុល្លារ​នេះ​បើ​យោងតាម​ទស្សនាវដ្ដី Forbes​។ សព្វថ្ងៃ​លោក​ក៏​ជា​សហគ្រិន​មួយរូប​ផងដែរ គឺ​តាមរយៈ​ការបង្កើត​ក្រុមហ៊ុន​លក់​សំលៀកបំពាក់​ខ្លួនឯង​មួយ​ដែលមាន​ឈ្មោះថា ZARA​។ តើ​មហាសេដ្ឋី​វ័យ​ចំណាស់​ម្នាក់នេះ​មាន​ប្រវត្តិ​និង​បទពិសោធន៍​ដូចម្តេចខ្លះ​? 

​លោក Gaona កើត​នៅ​ថ្ងៃទី ២៨ មិនា ឆ្នាំ ១៩៣៦ ក្នុង​ទីក្រុង Leon ប្រទេស​អេ​ស្ប៉ា​ញ ដោយ​លោក​បាន​ចំណាយពេល​កាលពី​នៅ​កុមារភាព​រស់នៅក្នុង​ទីក្រុង​មួយ​នេះ ប៉ុន្តែ​នៅពេលដែល​លោក​មាន​វ័យ ១៤ ឆ្នាំ​លោក​បាន​បោះបង់​ការសិក្សា​ចោល​ដោយសារ​ការងារ​ឪពុក​លោក​ជា​កម្មករ​ធ្វើ​ផ្លូវ​រថភ្លើង​។ បន្ទាប់ពី​ដើរ​តាម​ឪពុក​មួយ​រយៈពេល​ខ្លី​លោក​បានទទួល​ការងារ​មួយ​នៅក្នុង​ហាង​ផលិត​សំលៀកបំពាក់​ដោយ​ប្រើ​ដៃ​ជំនួស​ឲ្យ​ម៉ាស៊ីន​មួយ​ដែលមាន​ឈ្មោះថា Gala​។ 

​ដំណាល​ពេល​គ្នា​ដែល​លោក​កំពុងធ្វើការ​ក្នុង​ហាង Gala លោក Gaona បាន​សិក្សា​រៀនសូត្រ​ពី​របៀប​នៃ​ការធ្វើ​សំលៀកបំពាក់​ដោយ​ប្រើ​ដៃ​។ នៅក្នុង​ឆ្នាំ ១៩៧២ លោក Gaona បាន​ប្រមែប្រមូល​ស្ត្រី​ក្នុង​តំបន់ ហើយ​បង្កើត​ក្រុមហ៊ុន​មួយ​ឈ្មោះថា Confecciones Goa ដែល​ស្ត្រី​ទាំងនោះ​សុទ្ធតែជា​កម្មករ​ដេរ​សំលៀកបំពាក់​អាវ​ក្រោយពេល​ងូតទឹក​រួច​។ បី​ឆ្នាំ​ក្រោយមកទៀត​ពោលគឺ​ឆ្នាំ ១៩៧៥ លោក Gaona បាន​បើកហាង​លក់រាយ​សំលៀកបំពាក់​ជា​លើកដំបូង​របស់ខ្លួន​ដោយ​លោក​ចង់​ដាក់ឈ្មោះ​ហាង​នោះ​ថា Zorba ប៉ុន្តែ​ដោយសារ​ឈ្មោះ​នេះ​ត្រូវបាន​គេ​ប្រើ​រួចហើយ​ទើប​លោក​ប្តូរ​មកជា​ឈ្មោះ ZARA វិញ​។

 
​ក្រោយ​ទទួលបាន​ជោគជ័យ​បន្តិច​អស់​ច្រើន​ទសវត្ស​លោក Gaona បាន​បើក​សាខា​លក់​របស់​ក្រុមហ៊ុន ZARA ចំនួន ៨០ កន្លែង​នៅ​ពាសពេញ​ទីក្រុង Galicia ប្រទេស​អេ​ស្ប៉ា​ញ​។ ក្រោយមកទៀត​ក្រុមហ៊ុន ZARA ច្របាច់​បញ្ចូល​ជាមួយ​ក្រុមហ៊ុន​ផលិត​សំលៀកបំពាក់​មួយទៀត​មាន​ឈ្មោះថា Inditex Group ដោយ​លោក Gaona កាន់​ភាគហ៊ុន​ដល់​ទៅ ៥៩,២៩% ដោយ​ក្រុមហ៊ុន Inditex Group ជា​ក្រុមហ៊ុន​ផលិត​សំលៀកបំពាក់​ម៉ាក​ល្បី​ជាច្រើន​ផ្សេងទៀត​ក្រៅតែពី ZARA ដោយ​ក្រុមហ៊ុន​ទាំងពីរ​មាន​សាខា​លក់​ដល់​ទៅ ៦ ០០០ កន្លែង ជាមួយនឹង​បុគ្គលិក​ច្រើនជាង ៩២ ០០០ នាក់​។ 

Gaona ថ្លែងថា​លោក​មិនដែល​ភ្លេច​ប្រវត្តិ​របស់ខ្លួន​ឯង​ឡើយ ដោយ​លោក​តែងតែ​រត់គេច​ពី​ការសម្ភាសន៍​នានា​ពី​សារព័ត៌មាន រហូតមក​ទល់នឹង​ឆ្នាំ ១៩៩៩ លោក​បានផ្តល់​បទសម្ភាសន៍​ដំបូង​ជាមួយ​អ្នកសារព័ត៌មាន​ដែល​អនុញ្ញាត​ឲ្យ​ពួកគេ​ថតរូប​ចុះផ្សាយ​ជា​សាធារណៈ ដោយ​លោក​ថ្លែងថា​លោក​បាន​ចំណាយពេល ២៥ ក្នុង​ការខិតខំ​ប្រឹងប្រែង​ធ្វើការ​ដោយ​គ្មាន​ពេល​សម្រាក​សម្រាប់​ខ្លួនឯង​ឡើយ​។ ក្រោយពី​ជោគជ័យ​អស់​ច្រើន​ទសវត្ស​លោក Gaona បានប្រកាស​លាលែង​ចេញ​ពី​តំណែង​ជានា​យក​ប្រតិបត្តិ​របស់ Inditex Group ហើយ​លោក Pablo Isla ឡើងមក​កាន់តំណែង​ជំនួស​លោក​។​

http://www.thebnews.com/news/965.html